ON álgoálbmotáššiid bistevaš forum buvttii cuoŋománu 27. b. loahppaárvalusa iežaset sešuvdnaraportii. Forum ávžžuha Norgga eiseválddit čuovvolit Fovsen-duomu nu fargga go vejolaš. Raporttas daddjo maid ahte lea dehálaš ahte Norgga eiseválddit farggamusat álggahit doaibmabijuid vai vaššiságat ja cielaheapmi sápmelaččain eai šat lassánivčče, nugo návdet dáhpahuvvan maŋŋel Fovsen-ášši.
Mii lea ON álgoálbmotáššiid bistevaš forum?
ON ásahii bistevaš foruma 2000:s. Vuosttaš geardde go dat lágiduvvui lei New Yorkas 2002:s. Bistevaš forumis leat 16 láhttu. Bealli sis leat álgoálbmotorganisašuvnnat ja nubbi bealli leat máilmmi čieža regiovnna ráđđehusat. Norga lei mielde ásaheamen álgoálbmotforuma ja searvá juohke jagi.
Bistevaš forum lea ráđđeaddi orgána ONa ekonomalaš ja sosiála ráđđái, ja galgá buktit rávvagiid ja neavvagiid dakkár áššiin mat gusket máilmmi álgoálbmogiidda dáin fáttáin:
- ekonomalaš ja sosiála ovdáneapmi
- kultuvra
- oahpahus
- dearvvašvuohta
- olmmošvuoigatvuođat
Lassin dáidda fáttáide čalmmustahttá forum jahkásaččat dihto fáttá sin mandáhta siskkobealde. Forum doaibmá dán bokte riikkaidgaskasaš arenan ságastallamiidda ON:a miellahttostáhtaid, eamiálbmogiid ovddasteddjiid ja eará ON-orgánaid gaskka. Foruma buktá jahkásaččat raportta rávvagiiguin ONa ekonomalaš ja sosiála ráđđái dáid ságastallamiid vuođul. Ávžžuhusat sáhttet guoskat ovdamearkka dihte lahttoriikkaid áššiide, iešguđegelágan ON-orgánaide, organisašuvnnaide, ruhtadanvuogádagaide dahje ealáhuseallimii.
Dán jagáš forum lágiduvvui cuoŋománu 17.-28.b. ja fáddán lei vuoigatvuođavuđot lahkoneapmi álgoálbmogiidda, dálkkádatrievdamiidda ja dearvvašvuhtii.
Dáppe sáhtát lohkat eanet ON bissovaš foruma ja dán jagi fáttá birra ja NIM barggu birra Fovsen-áššiin: